Friday, February 26, 2016

ဘိန်းဖျက်ဆီးသူတွေ ရိုက်နှက်လို့ ရွာသား ၅ ဦး ဆေးရုံရောက်


ကချင်ပြည်နယ် ဝိုင်းမော်မြို့နယ် ဆဒုံးနဲ့ ကန်ပိုက်တီဒေသဘက်က ဘိန်းစိုက်ခင်းတွေကို သွားရောက်ဖျက်ဆီးနေတဲ့ Pat Jasan လို့ခေါ်တဲ့ ကချင်လူထုအခြေပြု ဘိန်းစိုက်ခင်းဖျက်ဆီးရေးအဖွဲ့ဟာ ဘိန်းစိုက်တောင်သူလို့ယူဆရသူ ရွာသား ၂၁ ယောက်ကို ဝေမိုးရွာထဲမှာ ဒီကနေ့ ရိုက်နှက်ဖမ်းဆီးခဲ့ရာ ဒဏ်ရာပြင်းထန်တဲ့ ရွာသား ၅ ဦးကို မြစ်ကြီးနားဆေးရုံမှာကုသဖို့ ပို့ဆောင်ထားရပါတယ်။

အဲ့ဒီရွာသားတွေကို Pat Jasan အဖွဲ့က ဖေဖော်ဝါရီ ၂၅ ရက်နေ့ နေ့လည်ပိုင်းက ဖမ်းဆီးခဲ့တာဖြစ်တယ်လို့ ဝိုင်းမော်မြို့မ ရဲစခန်းမှူးက RFA ကိုပြောပါတယ်။

" Pat Jasan အဖွဲ့က ဖမ်းမိတာ ၂၁ ယောက် ကျနော်တို့ဆီကိုရောက်လာတာ ရွာသားက ကျား ၁၉ ဦး မ ၂ ဦး ပေါင်း ၂၁ ဦးပေါ့၊ အဲ့မှာဒဏ်ရာရသူ ၅ ဦးက မြစ်ကြီးနားဆေးရုံမှာ တက်ရောက်ကုသနေတယ်၊ လောလောဆယ်တော့ ဒဏ်ရာရသူတွေကို ဆေးကုသပေးနေတဲ့ အနေအထားပါ၊ ဒဏ်ရာရတဲ့လူတွေကို ဝိုင်းမော်ဆေးရုံကိုပို့တယ်၊ ဝိုင်းမော်ဆေးရုံကလွှဲလို့ မြစ်ကြီးနားဆေးရုံမှာပါ၊ ကျန်တဲ့လူကတော့ ရဲစခန်းမှာခေါ်ထားတဲ့သဘောပါ"

ဖေဖော်ဝါရီ ၂၅ ရက်နေ့ ည ၁၁ နာရီအချိန်အထိ မြစ်ကြီးနားဆေးရုံမှာ ဘိန်းခင်းဖျက်ဆီးရေးအဖွဲ့က ဒါဏ်ရာရသူ ၂၉ ဦးနဲ့ ဘိန်းစိုက်တောင်သူလို့ ယူဆရသူတွေထဲက ဒဏ်ရာရရွာသား ၅ ဦးတို့ဟာ ဆေးကုသခံနေရပြီး ဒါဏ်ရာရသူတွေထဲက လက်ရှိအချိန်အထိ သေဆုံးတာတွေမရှိသေးဘူးလို့သိရပါတယ်။

ဒီအတောအတွင်း ဘိန်းခင်းဖျက်ဆီးလို့ တိုက်ခိုက်ခံရတာကို မကျေနပ်တဲ့ ကချင်တိုင်းရင်းသား လူငယ်နှစ်ထောင်ကျော်ဟာ မြစ်ကြီးနားမြို့မှာ ဖေဖော်ဝါရီ ၂၅ ရက်နေ့ ညပိုင်း ၆ နာရီကျော်ကနေ ၉ နာရီကျော်အထိ လှည့်လည်ဆန္ဒပြခဲ့ပါတယ်။

တုတ်လက်နက်တချို့ ကိုင်ဆောင်ထားတဲ့ အဲ့ဒီဆန္ဒပြသူတွေဟာ ကချင်ပြည်နယ်ဝန်ကြီးချုပ်နဲ့ ပြည်နယ်ရဲမှူးကြီး အိမ်ရှေ့၊ မြစ်ကြီးနား အမှတ် ၁ ရဲစခန်း၊ ပြည်နယ်ရဲတပ်ဖွဲ့ရုံး၊ ဦးဇခုန်တိန့်ယိန်းရဲ့ အိမ်နဲ့ ရုံးရှေ့တွေမှာ လှည့်လည်ဆန္ဒပြခဲ့ကြတာဖြစ်ပါတယ်။

ကချင်လူမှုအခြေပြု ဘိန်းခင်းတိုက်ဖျက်ရေးအဖွဲ့ဟာ အစိုးရရဲ့ လုံခြုံရေးစီမံပေးမှုနဲ့အတူ ဋ္ဌာနဆိုင်ရာတွေနဲ့ ပူးပေါင်းပြီး ဖေဖော်ဝါရီ ၂၃ ရက်နေ့ကစတင်ပြီး အဖွဲ့ကြီး ၆ ဖွဲ့ အဖွဲ့ငယ် ၂၆ဖွဲ့ခွဲကာ ဘိန်းခင်းဖျက်ဆီးရေးတွေကို ဆောင်ရွက်နေတာဖြစ်ပါတယ်။

ဒီနှစ်ဇန်နဝါရီ လဆန်းပိုင်းကစပြီး အခုအချိန်အထိ ကချင်ပြည်နယ်မှာ ဘိန်းစိုက်ခင်းဧက သုံးထောင်ကျော်ဖျက်ဆီးပြီးဖြစ်ပါတယ်။

RFA Burmese
https://www.facebook.com/RFA-Burmese

0 comments:

Post a Comment