Saturday, April 2, 2016

အီဒီယံနှင့်စကားပုံများ၏နောက်ကွယ်

အီဒီယံတွေ စကားပုံတွေကို နေ့စဉ်သုံးစကားမှာပဲဖြစ်ဖြစ် စာပေမှာပဲဖြစ်ဖြစ် တွင်တွင်ကျယ်ကျယ်အသုံးပြုကြပါတယ်။ ၄င်းတို့ကိုသုံးခြင်းဖြင့် ကိုယ်ပြောလိုရာကို ထိထိမိမိ ကွက်ကွက်ကွင်းကွင်းပြောနိုင်တယ်။ ကြားသူကလည်း လိုရင်းကို ချက်ခြင်းတန်းသိနိုင်တယ်။ မထသဘတ်စ်ကား အရမ်းကျပ်တာပဲလို့ ပြောတာထက် ဘတ်စ်ကားကတော့ ငါးပိသိပ်ငါးချဉ်သိပ်ပဲဟေ့ လို့ပြောတာက ပိုအရသာတွေ့တတ်ကြပါတယ်။ တစ်ခါတစ်လေကျတော့လဲ စကားပုံရဲ့နောက်ကွယ်က အဖြစ်အပျက်ရာဇ၀င်လေးတွေကို သိကြတယ်။ ဥပမာ- မြန်မာစာမှာ ``မအိပ်မနေအသက်ရှည်´´ ဆိုတဲ့စကားပုံကို ကြားရရင် မောင်ပေါက်ကျိုင်းရာဇ၀င်နဲ့ ဆက်စပ် ပြီးနားလည်ကြတယ်။ ဒါကြောင့်လည်း အီဒီယံတွေ၊ စကားပုံတွေဟာ ဘာသာစကားနဲ့ ယဉ်ကျေးမှု ကိုလေ့လာရေးမှာ အသုံးဝင်တွင်ကျယ်ပါတယ်။ အင်္ဂလိပ်ဘာသာမှာသုံးလေ့ရှိတဲ့စကားပုံတစ်ချို့နဲ့သူတို့ရဲ့နောက်ကွယ်က ရာဇ၀င်လေးတွေကို လေ့လာကြည့်ရအောင်။

“An apple a day keeps the doctor away.”
တစ်နေ့ပန်းသီးတစ်လုံးစားလျှင်ဆရာဝန်ဆီသွားစရာမလိုဘူးတဲ့။ ကျန်းမာတယ်ဆိုတဲ့သဘောပေါ့။ ဒီစကားပုံဟာ ရှေးခေတ် ရောမလူမျိုးတွေရဲ့ယုံကြည်မှုကလာပါသတဲ့။ သူတို့က ပန်းသီးဟာ ရောဂါဝေဒနာတွေကို ကုသနိုင်တဲ့ မှော်စွမ်းအင်တစ်မျိုးရှိတယ်လို့ ယုံကြည်ကြပါတယ်။ အမှန်တော့လည်း ပန်းသီးမှာ ဗီတာမင် C နဲ့ သတ္တုဓါတ်တွေအများအပြားပါဝင်တဲ့အတွက် ဆရာဝန်တွေ လူနာကို ဓါတ်စာပေးရာမှာတောင် ပန်းသီးကိုစားခိုင်း ကြတယ်မဟုတ်လား။

climb on the bandwagon
bandwagon ဆိုတာ ဘုရားပွဲတို့၊ ဆပ်ကပ်ပွဲတို့၊ သူတို့ဆီမှာ နိုင်ငံရေးလှည့်လည်တရားဟောပွဲတွေရှိတဲ့အခါ ဂီတပညာရှင်တွေ တီးဝိုင်းတွေတင်ပြီးလှည့်လည်တီးမှုတ်တဲ့ လှည်းမျိုးကိုခေါ်တာပါ။ ဟိုးအရင်တုန်းက ဒီလှည်းက တီးဝိုင်းတွေဟာ တန်းစီလှည့်လည်ပွဲတစ်ခုခု၊ ဒါမှမဟုတ် နိုင်ငံရေးတရားဟောတော့မယ်ဆိုရင် သီချင်းတီးမှုတ်ပြီး အချက်ပြကြပါတယ်တဲ့။ ဘေးနားကရှိတဲ့လူတွေကလည်း သူတို့ထောက်ခံကြောင်းပြချင်လို့ လှည်းပေါ်ကို တက်လိုက်ကြပါတယ်။ ဒီအီဒီယံကိုတော့ ကိုယ့်အကျိုးအတွက် သူများကို ထောက်ခံတတ်တဲ့လူမျိုးတွေကို ရည်ညွှန်းပြီး သုံးစွဲကြပါတယ်။

Saved by the bell
save ဆိုတော့ သိမ်းဆည်းတာ၊ ချိုးခြံချွေတာတယ်၊ ကယ်တင်တယ်ဆိုတဲ့အဓိပ္ပါယ်။ ရာဇ၀င်က ၁၇ ရာစုနှစ်လောက်မှာ တဲ့။ အင်္ဂလန်နိုင်ငံက ၀င်ဆာ ရဲတိုက်ကို စောင့်ရတဲ့ အစောင့်တစ်ယောက်ကို တာဝန်ချိန်မှာ အိပ်တယ်ဆိုပြီး အစွပ်စွဲခံရတယ်။ ဒီတော့ အစောင့်ကလည်း သူအိပ်မငိုက်ပါဘူး။ သူ့ကို မှားယွင်းစွပ်စွဲတာပါ။ သူသက်သေပြနိုင်ပါတယ်လို့ပြန်ပြောတယ်။ သူ့ရဲ့သက်သေကတော့ အဲဒီညက ဘုရားကျောင်းက ညသန်းခေါင်မှာ ခေါင်းလောင်း ၁၃ ချက် ထိုးခဲ့တာသူကြားတယ်လို့ပြောပြတယ်။ မြို့သူမြို့သားတွေက လည်း ထောက်ခံကြတယ်။ ဒါနဲ့ပဲ သူအရေးယူမခံခဲ့ရပါဘူး။ ယနေ့ခေတ်မှာလည်း လက်ဝှေ့ထိုးတဲ့သူတွေ တစ်ချီပြီးရင် ခေါင်းလောင်းထိုးလိုက်တဲ့အခါ အနားယူကြရတယ်။ ကျောင်းသားတွေ လည်း ကျောင်းဆင်း ခေါင်းလောင်းသံကြားရင် စိတ်လက်ပေါ့ပါးသွားတယ်။ ဒီအီဒီယံရဲ့ဆိုလိုရင်းကတော့ နောက်ဆုံး အခြေအနေလေးမှာ ကယ်တင်ခံလိုက်ရတယ်။ သက်သာရာရသွားတယ်လို့ ဆိုချင်တာပါ။

Bury the hatchet
မြန်မာမှာလည်းရှိပါတယ်။ ပြည်ဖုံးကားချတယ်။ ကျေအေးလိုက်တယ်ဆိုတဲ့သဘော။ အမေရိကန် ဌာနေတိုင်းရင်းသား တွေဟာ ရန်သူတွေနဲ့ ငြိမ်းချမ်းရေးယူလိုက်တယ်။ ရန်ပွဲတွေပြီးသွားပြီလို့ ဆိုချင်ရင် သူတို့ရဲ့ ပုဆိန်ကိုမြေကြီးထဲမြှုပ်ပြီးပြကြတယ်တဲ့။

A close shave
ကပ်သီလေးလွတ်သားတယ်။ အရင်တုန်းက ဆံသပညာသင်တဲ့သင်တန်းသားတွေဟာ တကယ့်ဖောက်သည်တွေနဲ့ လေ့ကျင့်ကြရပါတယ်တဲ့။ မုတ်ဆိပ်မွှေးရိပ်ရာမှာ အရမ်းကပ်ပြီးရိပ်လိုက်လို့ရှိရင် ဓါးထိရင်ထိ၊ မထိရင်လဲ ကပ်သီကလေးလွတ်ပဲလွတ်တတ်ကြတယ်။ အခုအခါမှာတော့ အန္တရာယ်အကျပ်အတည်း တစ်ခုကနေ သီသီကလေးလွတ်မြောက်သွားတာကိုရည်ရွယ်ပြောကြတယ်။

Dot the i's and cross the t's
ပုံနှိပ်စာလုံးတွေ၊ လက်နှိပ်စက်တွေ၊ ကွန်ပျူတာတွေမပေါ်ခင်တုန်းက စာရေးဝန်ထမ်းတွေအတွက် စာအရေးအသားရေးရာမှာ အင်မတန်ဂရုစိုက်ရပါတယ်။ အထူးသဖြင့် အင်္ဂလိပ်စာလုံး i နဲ့ t ဟာ ရောတတ် မှားတတ်တဲ့အတွက်ဂရုစိုက်ရပါတယ်။ အဲဒီအချိန်ကစလို့ အသေးစိတ်ကအစ ဂရုစိုက်ပါလို့ပြောချင်ရင် ဒီအီဒီယံကို သုံးလေ့ရှိကြတယ်။

He who pays the piper calls the tune
ဥရောပအလယ်ခေတ်တုန်းက အရပ်ထဲလှည့်ပြီး တီးမှုတ်ဖျော်ဖြေတဲ့သူတွေရှိခဲ့တယ်။ အခကြေးငွေပေးနိုင်တဲ့သူဟာ သူကြိုက်တဲ့ တီးလုံး၊ သီချင်းကို တီးခိုင်းနိုင်တယ်။ ဒီတော့ ငွေကုန်ခံနိုင်သူ ဆရာကြီးဖြစ်တယ်ဆိုတဲ့အဓိပ္ပါယ်ပေါ့။

The pen is mightier than the sword
ဓါးသွားထက် ကလောင်သွားထက်။ ၁၇ ရာစုလောက်တုန်းက အင်္ဂလန်နိုင်ငံမှာ လွတ်လပ်စွာထုတ်ဖော် ရေးသားခွင့် မရကြဘူးတဲ့။(သနားပါတယ်နော်)။ အစိုးရဆန့်ကျင်တဲ့ စာတွေရေးသားသူတွေကို ဖမ်းဆီးအရေးယူတာပေါ့။ (ပျင်းတောင်ပျင်းသေးတယ်။)  ဒါပေမယ့်လည်း လူတွေကတော့ သူတို့အတွေးအခေါ် အယူအဆတွေကို လက်ကမ်းစာစောင်လေးတွေကနေ ဆက်လက်ဖြန့်ဝေကြတယ်။ အမှန်တရားကို ဓါးတွေလှံတွေနဲ့ တားဆီးလို့ မရဘူးပေါ့။

The pot calling the kettle black
သူခိုးကလူလူဟစ်။ ရှေးခေတ်တုန်းက ခရား နဲ့ အိုး နှစ်ခုစလုံးဟာ မီးဖိုပေါ်မှာတိုက်ရိုက်သုံးရလို့ အမည်းရောင်ရှိကြတယ်။ အတူတူပဲပေါ့။ ဒါကြောင့် အတူတူမှာ ကိုယ့်အပြစ်ကို သူ့အပြစ်လုပ်တတ်တဲ့သူတွေကိုခေါ်ကြတာ။

Raining cats and dogs
သည်းကြီးမည်းကြီးမိုးရွာတယ်။ နော်ဝေဒဏ္ဍာရီ မှာ လေကို ခွေး နှင့်ဆက်စပ်ကြတယ်။ မုန်တိုင်းကို ကြောင်နှင့်နှိုင်းကြတယ်။

shed crocodile tears
မိကျောင်းတွေမှာ သူတို့ ပါးစပ်ဟလိုက်ရင် မျက်လုံးကနေ မျက်ရည်ထွက်လာစေတဲ့ အလိုအလျောက်တုံ့ပြန်စနစ် တစ်ခုရှိတယ်။ ဒီတော့ ရိုးရိုးကြည့်လိုက်ရင် မိကျောင်းတွေဟာ သူတို့သားကောင်ကို မျက်ရည်ကျရင်းနဲ့စားနေ သလိုမျိုး ဖြစ်သွားတယ်။ အပြင် ဟန်ဆောင်မျက်ရည်ထွက်ပြ၊ ၀မ်းနည်းပြ နေပေမယ့်လည်း အတွင်းစိတ်က အကြင်နာကင်းတဲ့လူတွေကိုခေါ်တာပေါ့။


လေးစားလျက်


ဇာနည်(MyWay!)

0 comments:

Post a Comment