Ad Code

Responsive Advertisement

စကားကြီးဆယ်ခွန်း



ကျွန်တော်တို့ လူ့ပတ်ဝန်းကျင်မှာ စကားအပြောအဆိုလိမ္မာပါးနပ်မှုဟာ အရေးကြီးပါတယ်..
မြန်မာ့ရိုးရာမှာတော့ စကားပြောဆိုနည်း (၁၀) မျိုးဆိုပြီး သတ်မှတ်ထားတာ အားလုံးသိပြီးဖြစ်ပါတယ်...
ဒါပေမယ့် သေချာတိတိကျကျလေး သိကြရအောင် ဖတ်ဖူးခဲ့တာလေး ပြန်ဝေမျှလိုက်ပါတယ်...။

(၁) ရေကူးညာတင် ပြောနည်း
မြစ်တစ်စင်းရဲ့အထက်ကို အညာဟုခေါ်ပြီး အောက်ဖက်ကို အကြေလို့ခေါ်ပါတယ်။ အညာကို ဆန်တက်တယ် လို့ခေါ်ပြီး အကြေကိုကျတော့ စုန်ဆင်းတယ်လို့ဆိုပါတယ်။ မြစ်ရေက အထက်ကအောက်ကို စီးဆင်းတော့ အညာမှအကြေသို့စုန်တယ်လို့ ဆိုပါတယ်။  မြစ်ကိုကန့်လန့်ဖြတ်ကူးမယ်ဆိုရင် လိုရာရောက်ဖို့အတွက် အပေါ်(အညာ)ဖက်က ကူးရပြီး အဲ့ဒါမှ လိုရာရောက်မှာပါ။
အဲလိုပဲ စကားပြောရာမှာလဲ အခြေအနေနှင့်အချိန်အခါကိုတွက်ပြီး ပိုပိုသာသာပြောခြင်းကို ရေကူးညာတင်ပြောနည်းလို့ ခေါ်ပါတယ်။ ကတိစကားတွေမှာအသုံးဝင်ပါတယ်.. ဥပမာ.. အလုပ်တစ်ခုကို ၃ရက်နဲပြီးနိုင်ပေမယ့် ၅ရက်လောက်ထိစောင့်ပေးပါလို့ ပြောတာမျိုးဖြစ်ပါတယ်။

(၂) ကောက်ပင်ရိတ်လှီး ပြောနည်း
ကောက်ပင်ရိတ်တယ်ဆိုတာ လယ်ကွင်းထဲက ကောက်ပင်တွေကို လက်ထဲဝင်နိုင်သမျှဆွဲယူပြီး ဆုပ်ကိုင်ကာ ကျန်တစ်ဖက်က တံစဉ်ကိုင်ပြီး အရင်းမှပိုင်းဖြတ်ရပါတယ်။
အဲ့လိုပဲ တဖက်သားရဲ့စကားကို မိမိရရမှတ်သားပြီး ကိုယ့်အလှည့်မှာ အနိုင်ပိုင်းပြီး ပြောဆိုတာကို ခေါ်တာပါ။
မဲဆွယ်၊ စကားရည်လုပွဲတွေမှာ သုံးပါတယ်။

(၃)  ရေစီးဖောင်ဆန် ပြောနည်း
ရေစီးကိုဆန်တက်ရတဲ့ဖောင်ဟာ လိုရာရောက်ဖို့ ဇွဲ၊လုံ့လ သာမက စားနပ်ရိက္ခာ၊ လုပ်အား၊ စသည်ဖြင့်လိုပါတယ်။
အဲ့လိုပဲ စကားပြောရာမှာ ဥပမာများ၊ အချက်အလက်များ၊ နဲ့ စီစဉ်ပြီးပြောတာကို ခေါ်တာပါ။
မိမိကို နိုင်ထက်စီးနင်းပြောလာတဲ့အခါ ထိထိမိမိပြန်ပြောနိုင်ဖို့ သုံးပါတယ်။


(၄) အိုးတန်ဆန်ခပ် ပြောနည်း
အိုးနဲ့ဆန် တန်အောင်ချက်ရင် ကောင်းမွန်တဲ့ထမင်းစားရမှာပါ။ အိုးသေးထဲ ဆန်အများကြီးချက်ရင် ပြည့်ကျပ်ပြီး မနူးနပ်တော့ပါ။ အိုးကြီးထဲ ဆန်နဲရင်လည်း တူးကပ်ပြီးအဆင်မပြေပါ။
ဒါကြောင့် မိမိအခြေအနေနဲ့ တူတန်တဲ့စကားပြောခြင်းကို ခေါ်ပါတယ်။ လုပ်နိုင်သလောက်ပဲ ပြောတာမျိုးပေါ့...။ အပြောနဲ့အလုပ်ညီဖို့ ဒီနည်းကိုသုံးကြပါတယ်။

(၅)ဆီပွတ်ကျည်ပွေ့ ပြောနည်း
ဆီကြိတ်ရင် ဆီထွက်များဖို့ အထပ်ထပ်ပွတ်ရပါတယ်။
အဲ့လိုပဲ မိမိစကားကိုသူများမှတ်မိစေဖို့ ထပ်ကာထပ်ကာ ပြောခြင်းမျိုးပါ။ ဆုံးမ သြ၀ါဒ ပေးတဲ့အခါ သုံးကြပါတယ်။

(၆) ဆင်ဝှေ့ရန်ရှောင် ပြောနည်း
ဆင်ထိန်းတွေ ဆင်ကိုသင်ပြတဲ့အခါ ရှေ့တည့်တည့်ကသင်လို့မရပါဘူး။ ဆင်ဝှေ့လိုက်ရင် အန္တရာယ်ရှိလို့ပါ။
အဲ့လိုပဲ မိမိကိုထိခိုက်မယ့်စကားတွေကို ရှောင်ပြီး လှီးလွှဲပြောခြင်းကို ခေါ်တာပါ။
သွယ်ဝိုက်ပြောချင်တဲ့အခါ၊ ဆင်ခြေပေးတဲ့အခါတွေမှာ သုံးပါတယ်။ (အလျှောက်ကောင်း၊ အထောင်းသက်သာ စကားပုံလိုပေါ့...)

(၇) တောင်သူယာခုတ် ပြောနည်း
တောင်သူတွေယာခုတ်ရင်  ချုံ၊ သစ်ပင်ငယ်တွေကို ရှင်းပြီးမှ သစ်ပင်ကြီးတွေကိုရှင်းပါတယ်။ အဲ့ဒါမှကျယ်ပြန့်တဲ့ယာခင်းကို ရမှာပါ။
အဲလိုပဲ စကားစပြောတဲ့အခါ စိတ်ဝင်စားစရာနဲ့စပြီး နောက်မှ မိမိပြောချင်တာကို လေးနက်ထိမိစွာပြောခြင်းမျိုးပါ။
ကိုယ်ပြောချင်တာကို လူအများဂရုစိုက် ၊ စိတ်ဝင်စားအောင်ပြောတဲ့အခါ သုံးပါတယ်။

(၈) ကြက်ဆုတ်ခွပ်ပစ် ပြောနည်း
ကြက်နှစ်ကောင်ခွပ်ရင် နောက်ဆုတ်ဟုန်ပြုပြီးမှ တကယ်ခွပ်တဲ့အခါ အပေါ်စီးက ခွပ်လေ့ရှိပါတယ်။
အဲ့လိုပဲ စကားပြောရင် သူများပြောတာ သည်းခံနားထောင်ပြီး အခွင့်သာမှ အပေါ်စီးကအပိုင်ပြောချခြင်းကို ခေါ်ပါတယ်။
အကြောင်းအရာတစ်ခုခု ငြင်းခုန်၊ စကားနိုင်လုရင် သုံးကြပါတယ်။

(၉) ရေစစ်ကရား ပြောနည်း
ရေစစ်ကရားကို ရေစစ်ပြီးဖြည့်ပါ။ ရေပြည့်ရင် လက်နဲ့ပိတ်ပြီးမလိုက်တဲ့အခါ ရေထွက်ကျခြင်းမရှိတော့ပါ။
စကားပြောတဲ့အခါမှာ သူများစကားကို သေချာဖမ်းဆုတ်ပြီး တဖက်လူ မငြင်းနိုင်အောင် အပိုင်ပြောခြင်းကိုခေါ်တာပါ။
စကားပြောကျွမ်းကျင်သူတွေရဲ့ ဟာကွက်၊လွတ်ကွက်တွေကို ရှာပြီး ချည်တုပ်ကာ ပြန်မပြောနိုင်အောင်ပြောရာမှာ သုံးပါတယ်။

(၁၀) ခတ်တင်မောင်းနင်း ပြောနည်း
ခတ်တင်မောင်းနင်းဆိုတာ မတင်မကျသဘောပါ။
ဟုတ်တယ်လဲမပြော၊ မဟုတ်ဘူးလဲမပြောဘဲ မတင်မကျပြောတာမျိုးပါ။
တဖက်သားစကားကို အဆိုးအကောင်းမဝေဖန်ဘဲ ကိုယ်တိုင်ပဲ ဆုံးဖြတ်ပါလို့ အကြံပေးတဲ့အခါ သုံးပါတယ်။

စကားပြောဆိုရာတွင် ညီညွတ်ရမည့် အင်္ဂါရပ် (၁၀) မျိုး လဲရှိပါသေးတယ်...။
၁။  ကာလ၀ါဒီ    =  ပြောချိန်သင့်မှ ပြောခြင်း။
၂။  ဘူတာဝါဒီ    =  မှန်သောစကား ကိုပြောခြင်း။
၃။  ဓမ္မ၀ါဒီ        =   တရားသဖြင့် ပြောခြင်း။
၎။ အတ္တ၀ါဒီ    =  အကျိုးရှိအောင်ပြောခြင်း။
၅။ ပီယ၀ါဒီ    =  နှစ်လိုဖွယ် ကောင်းသော စကားကိုပြောခြင်း။
၆။ ပီယိစာ ပုမ္ဗ၀ါဒီ    =  ပြုံးရွှင်စွာ ပြောခြင်း။
၇။ အတုရိတ၀ါဒီ    =  အလျင်စလို မပြောခြင်း။
၈။ ပေါရီ        =  ယဉ်ကျေး သိမ်မွေ့စွာ ပြောခြင်း။
၉။ မိတဘာဏီ    =  မတိုမရှည် ချင့်ချိန် ပြောခြင်း။
၁၀။ ၀ိသဒိဝါဒီ    =  တိကျပြတ်သားစွာ ပြောခြင်း။
တို့ပဲ ဖြစ်ပါတယ်...။
http://thutakabar.blogspot.com/

Post a Comment

0 Comments

Close Menu