Mee Pok

 Mee Pok လုပ်နည်းလေး ရေးချင်လို့ ဘလော့ဂ်လေးကို ဖုန်လာခါပါတယ်။ ဘလော့ဂ်လေး တစ်ခုရှိတာ ဒီနေရကျ သိပ်ကို အသုံးဝင်ပါတယ်။ ကိုယ်ချက်စားတာလေးတွေ ကို အမှတ်တရ ရေးထား သိမ်းထား၊ ပြန်ချက်ချင်ရင် ပြန်ရှာ ချက်ရုံပဲ။ ဟင်းချက်နည်း မေးတဲ့ အန်တီဆွိရဲ့ ပိတ်သတ်တွေ အတွက်လဲ အဆင်တပြေ ကြည့်လို့ရတော့ ဒီမှာပဲ အမြဲလာရှယ် ဖြစ်ပါတယ်။

ခုအပတ်တော့ စောနက ပြောသလို  စင်္ကာပူမှာနေတုံးက အရမ်း ကြိုက်လို့ ဟော်ကာ စင်တာတွေ ရောက်တိုင်း အမြဲ စားဖြစ်တဲ့ Mee Pok လုပ်နည်းလေး ရေးပါဦးမယ်။ 

 Mee Pok အတွက် လိုအပ်တာတွေက

Soup (ဟင်းချိုုရည်)  အတွက် (လူ ၆ယောက်စာခန့်)

(၁) ဝက်ရိုး  ၅၀၀ ဂရမ်

(၂) ပဲပိစပ် (soya bean) လက် ၂ဆုတ်စာခန့်

(၃) ငါးနီတူု ငါးခြောက် (Iken Bilis) လက်တစ်ဆုတ်စာခန့်

(၄) ဂျင်း ပါးပါး ၂ပြားခန့်

(၅) ဆား သင့်သလို

(၆) ဟင်းခတ်မှန့် သင့်သလို

(၇)ရေ ၂လီတာ

အားလုံးကို ၂နာရီခန့် ကြိုပြီး ဆားအပေါ့အငံ အချို စိတ်ကြိုက်ပြင်ထားပါ။

Sauce အတွက် (ဟင်းတစ်ပွဲစာစီ)

(၁) ပဲငံပြာရည် အကြည်ရေ လဖက်ရည် တစ်ဇွန်း

(၂) ငါးငံပြာရည် လက်ဖက်ရည် ဇွန်းဝက်

(၃) ပဲငံပြာရည် အနောက်ရည် လဖက်ရည် တစ်ဇွန်း

(၄) ဝက်ဆီ စားပွဲဇွန်း တစ်ဇွန်း (ဝက်ဆီဖတ် ကို သေးသေးလေးတွေ လှီးပြီး ဆီနဲ့ ကြော်ပါ။ ဆီပေါက်တတ်လို့ အဖုံးအုပ် ကြော်ပါရန်။ ကြော်ပြီး ဝက်ဆီဖတ်လေးတွေ သတ်သတ်၊ ဝက်ဆီ သတ်သတ် ခွဲကော်ထားပါ)

(၅) မလေး ငပိကြော် ငရုပ်ဆီ ( Sambal Tumis )  စားပွဲဇွန်း ၂ဇွန်းခန့် (ဆိုင်တွေမှာ ဝယ်လို့ရပါတယ်။ ပုံမှာကြည့်ပါ ။ ဆိုင်တွေက ဆီနဲလို့ ကိုယ့်အိမ်မှာ ငရုပ်သီးအရောင်တင်ကို ဆီချက်ပြီး ရောထည့်ပါတယ်။ ဒါမှ အရောင်လှပါတယ်။)

(၆) Black vinegar လဖက်ရည် တစ်ဇွန်း

(၇) ကြက်သွန်ဖြူ ဆီချက် စားပွဲဇွန်း တစ်ဇွန်း 

တခြား ingredient များ ပြင်ထားရန်

(၁) ခေါက်ဆွဲပြား (အစိုမရှိလျှင် အခြောက်ကို ပြုတ်ပြီး ရေစစ်ပါ။ အေးသွားလျှင် ဆီ အနည်းငယ် ဆမ်းပြီး နှံ့အောင် နယ်ထားပါ)  

(၂) ဝက်သားအကြေ (ပဲငံပြာရည် အကြည်ရေ၊ ငရုပ်ကောင်း- white pepper တို့နဲ့ နယ်ထားပါ) 

(၃) ဝက် အသဲ  (ပါးပါးလှီးပြီး ပဲငံပြာရည် အကြည်ရေ၊ ငရုပ်ကောင်း တို့နဲ့ နယ်ထားပါ)

(၄) တရုတ် မှိုခြောက် (Dried Shiitake Mushroom) ( ရေစိမ်၊ ပါးပါးလှီးပြီး ပဲငံပြာရည် အကြည်ရည်၊   အနောက်ရည်၊ ခရုဆီ၊ နှမ်းဆီ၊ သကြား၊ ကြက်သွန်ဖြူထောင်းထားတာတွေနဲ့ ရေအနည်းငယ်ထည့်ပြီး၊ ရေ ခမ်းသည်အထိနာရီဝက်ခန့် ပြုတ်ထားပါ)

(၅) ဆလတ်ရွက်ထုပ် (Lettuce)  ကို အရွက်လေးတွေ ခွာထားပါ။

(၆) Fish ball လေးတွေကို ပါးပါး လှီးထားပါ။

(၇) ဝက်ဆီဖတ်ကြော်

(၈) ကြက်သွန်မြိတ်ကို ပါးပါး ရိတ်ရိတ်လေးတွေ လှီးထားပါ။

ဟင်းပွဲ ပြင်ရန်

ပန်းကန်ထဲကို အပေါ်က ပြောထားတဲ့ sauce  တစ်ပွဲစာ ထည့်ထားပါ။

 

 

ပြီးရင် ဆလတ်ရွက်လေးတွေကို ဘေးပတ်ပတ်လည်မှာ ထည့်ပြင်လိုက်ပါ။

စောနက ဟင်းချိုအိုး အကြီး ပွက်ပွက်ဆူတဲ့ အထဲက နောက် အသားတွေ ထည့် ပြုတ်မဲ့ အိုး အသေးလေးထဲကို စကာ မြုတ်သည် ထိအောင် ဟင်းချိုများ လောင်းထည့်ပါ။ မီးပြင်းပြင်းနဲ့ တည်ပြီး ပွက်လာရင် စကာထဲ ခေါက်ဆွဲ ထည့်ပြုတ်ပြီး ခေါက်ဆွဲကို ဟင်းပြင်တဲ့ ပန်းကန်ထဲ စစ်ထည့်ပါ။

နောက် တစ်ခါ  စကာထဲ အသား အကြေ၊ fish ball၊ ဝက်အသည်းတို့ကို ကျက်အောင် ၃မိနစ်ခန့် ထည့်ပြုတ်ပြီး အပေါ်ကပြင်ထားတဲ့ ခေါက်ဆွဲပန်းကန်ထဲထည့်ပါ။ ဟင်းချိုရည် ၂ဇွန်းခန့်ကိုလည်း ထည့်ပါ။ မှိုထည့် ၊ကြက်သွန်မြိတ်နဲ့ ဝက်ဆီဖတ်လေးတွေ အပေါ်ဖြူးပြီးရင် စားဖို့ အဆင်သင့်ဖြစ်ပါပြီ။ 

ဟင်းချို အိုးကြီးထဲက ဟင်းရည်ကို ဟင်းချိုသောက် ပန်းကန် အသေးလေးထဲထည့် ကြက်သွန်မြိတ်လေး ဖြူးထည့်ရင် Mee Pok နဲ့ တွဲ စားဖို့ ဟင်းချိုလည်း အဆင်သင့် ဖြစ်ပါင်္ပြီ။

အားလုံး သုံးဆောင်နိူင်ကြပါပြီရှင်။

Ref: http://auntysweet.blogspot.com/2016/03/mee-pok.html