(၃၈)ဖြာ မင်္ဂလာတရားတော်

၁။ ပေါင်းသင်းဆက်ဆံရေး မင်္ဂလာ(၃) ပါ: 

 

 - လူမိုက်ဆိုလျှင် ရှောင်သွေလွဲလို့၊ မမှီဝဲနဲ့ ကင်းအောင်နေ၊

ပညာရှိကို အရှည်တွဲလို့၊ မှီဝဲဆည်းကပ် နည်းယူစေ၊

သုံးပါးရတနာ မိဘများနှင့်၊ ဆရာသမားကို ပူဇော်လေ၊

ချမ်းသာကိုပေး ဆက်ဆံရေး၊ မျှော်တွေး သုံးချက်ပေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၂။ နေထိုင်ရေး မင်္ဂလာ(၃)ပါး

- ကုသိုလ် ပညာ ဥစ္စာရဖို့၊ သင့်ရာဒေသ အမြဲနေ၊

ရှေးကတင်ကြို ပြုခဲ့ဖူးသည့်၊ ကောင်းမှု အထူး ရှိပါစေ၊

မိမိကိုယ်ကို ကောင်းအောင် ထိန်းလို့၊ မတိမ်းစေနဲ့ ဆောက်တည်လေ၊

ဥစ္စာကိုပေး နေထိုင်ရေး၊ မျှော်တွေး သုံးချက်ပေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

...............................................................................

၃။ သင်ကြားရေး မင်္ဂလာ ၄ပါး

တတ်ကောင်းတတ်ရာ ဟူသမျှကို၊ ကြားမြင်သုတ ရှိပါစေ၊

အိုးအိမ်တည်ထောင် ဝမ်းစာရေးနဲ့၊

အသက်မွေးဖို့ အတတ်သင်လေ၊

လူနှင့်ဆိုင်ရာ ကျင့်ဝတ်များကို

ကောင်းစွာသင်ကြား နားလည်စေ၊

မှန်ကန်ယဉ်ကျေး ချိုသာအေး၊ ဆိုရေးတတ်ပါစေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

........................................................................

၄။ ပြုစုရေး မင်္ဂလာ ၃ ပါး 

မြင်းမိုရ်ရွှေတောင် မိဘကြွေးကို၊ ကောင်းစွာဆပ်ပေး ဝတ်ကျေကျေ၊

ကြွေးသစ်ချကာ သားနှင့်မယား၊ မြှောက်စားချီးမြှင့် ဝတ်ကုန်စေ၊

အလုပ်တာဝန် မလစ်ဟင်းနှင့်၊ အပြစ်ကင်းအောင် လုပ်ပါလေ၊

စည်းစိမ်ကိုပေး ပြုစုရေး၊ မျှော်တွေး သုံးချက်ပေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၅။ လိုက်နာကျင့်သုံးရေး မင်္ဂလာ ၄ ပါး 

သုံးတန်စေတနာ ဖြူစင်လန်းလို့၊ ပေးကမ်းဝေမျှ လှုနိုင်စေ၊

ကိုယ်နှုတ်စိတ်ကြံ မမိုက်မှားနဲ့၊ သုစရိုက်တရားကို ကြင့်ပါလေ၊

ဆွေမျိုးတွေကို ပြင်ပမထားနဲ့၊ သင်္ဂဟတရားနဲ့ ချီးမြှောက်လေ၊

သန့်စင်ပြစ်မျိုး လူထုကျိုး၊ သည်ပိုးဆောင်ရွက်စေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၆။ ရှောင်ကြဉ်ရေး မင်္ဂလာ ၄ ပါး 

 

 မကောင်းမှုတွေ ဟူသမျှကို၊ မတွေ့ခင်က ရှောင်ကြဉ်လေ၊

တွေ့ကြုံလာရင် မလွန်ကြူးနဲ့၊ အထူးသဖြင့် စောင့်စည်းနေ၊

အရက်သေစာ မသောက်စားနဲ့၊ မှောက်မှားတတ်တဲ့ အရာပေ၊

လုပ်ကိုင်ပြောကြား သတိထား၊ တရားမမေ့စေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၇။ စိတ်ထားရေး မင်္ဂလာ ၅ ပါး

 

 အသက်ဂုဏ်ဝါ ကိုယ့်ထက်ကြီးက၊ ဆည်းကပ်ခစား ရိုသေလေ၊

မာနတံခွန် ဂုဏ်မကြွနဲ့၊ ကိုယ့်ကိုယ်နှိမ်ချ အမြဲနေ၊

လောဘအပို လိုမလိုက်နဲ့၊ ကိုယ်ထိုက်တာနဲ့ ကျေနပ်လေ၊

ကိုယ့်ပေါ်ပြုဖူး သူ့ကျေးဇူး၊ အထူးသိတတ်စေ၊

ကောင်းကျိုးဆင့်ပွား မြတ်တရား၊ နာကြားမပြတ်ပေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၈။ သည်းခံရေး မင်္ဂလာ ၄ ပါး 

ဝတ် စား နေထိုင် ရန်ခပ်သိမ်း၊ စိတ်ကိုချုပ်ထိန်း သည်းခံလေ၊

ကျိုးကြောင်း ပြညွှန် ဆုံးမစကားကို၊ ပြောကြားလာက နာလွယ်စေ၊

သူမြတ်ပုဂ္ဂိလ် ဟူသမျှ၊ မကြာခဏ တွေ့ဆုံလေ၊

သဘာဝတွေး မှန်ကန်ရေး၊ ဆွေးနွေး မပြတ်ပေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

.....................................................................................................................

၉။ ခြိုးခြံရေး မင်္ဂလာ ၄ ပါး 

 

လောကီအာရုံ ဇိမ်ယစ်မူးလို့၊ အပျော်မကြူးနဲ့ ခြိုးခြံလေ၊

မေတ္တာ ဗြဟ္မစိုရ် လက်ကိုင်သုံးလို့၊ သူမြတ်ကျင်.ထုံး ယွင်းမသွေ၊

လေးပါးသစ္စာ ဉာဏ်မြင်ကြည့်လို့၊ အမှန်သိအောင် ကြိုးစားလေ၊

ဒုက္ခလွတ်ကင်း နိဗ္ဗာန်ချဉ်း၊ အလင်းပေါက်နိုင်စေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

................................................................................................................

၁၀။ စိတ်ဓာတ်ခိုင်ခံ့ရေး မင်္ဂလာ ၄ ပါး

 

 ဆင်းရဲချမ်းသာ သဘာဝ၊ တွေ့ကြုံနေကျ လူတိုင်းပေ၊

ကောင်းဆိုးနှစ်တန် အစုံတွဲလို့၊ တစ်လှဲ့စီလှည့် အမြဲနေ၊

လောကဓံကြုံ မဖြုံတမ်းပေါ့၊ မတုန်စမ်းနဲ့ စိတ်ခိုင်စေ၊

သောကကိုထိန်း ရမ္မက်သိမ်း၊ အေးငြိမ်း ချမ်းသာနေ၊

အဲဒါမှ ..... ဗုဒ္ဓဝါဒ ကမ္ဘာ့မင်္ဂလာတွေ။

......................... 

မေတ္တာဖြင်. စုစည်းတင်ပြသူ

အနှိုင်းမဲ.စာတိုပေစများ

Ref: http://tmtyr.blogspot.com/2013/08/blog-post_2897.html

၁။ အသေဝနာစဗာလာနံ = လူမိုက်တို့ကို မဆည်းကပ်ခြင်း၊

၂။ ပဏ္ဍိတာနဉ္စသေဝနာ = ပညာရှိတို့ကို ဆည်းကပ်ခြင်း၊

၃။ ပူဇာစပူဇနေယျာနံ = ပူဇော်ထိုက်သူတို့အား ပူဇော်ခြင်း၊

၄။ ပတိရူပဒေသဝါသောစ = သင့်တင့်သောအရပ်၌ နေထိုင်ခြင်း၊

၅။ ပုဗ္ဗေစ ကတပုညတာ = ပြုခဲ့သော ကောင်းမှုရှိသောသူဖြစ်ခြင်း၊

၆။ အတ္တသမာပဏီဓိ = မိမိကိုယ်ကို ကောင်းစွာဆောက်တည်ခြင်း၊

၇။ ဗာဟုဿစ္စ = အကြားအမြင် များသောသူဖြစ်ခြင်း၊

၈။ သိပ္ပ = လက်မှုပညာ အစရှိသော အပြစ်မရှိသော အတတ်တို့ကို တတ်ခြင်း၊

၉။ ဝိနယောစ သုသိက္ခိတော = ကောင်းစွာသင်အပ်သော ဝိနည်းတရားရှိခြင်း၊

၁၀။ သုဘာသိတဝါစာ = ကောင်းစွာဆိုခြင်း၊

၁၁။ မာတာပိတု ဥပဌာန = အမိအဘတို့ကို ကောင်းစွာလုပ်ကျွေးခြင်း၊

၁၂။ ပုတ္တဒါရဿသင်္ဂဟ = သားမယားတို့အား သင်္ဂြိုဟ်ထောက်ပံ့ခြင်း၊

၁၃။ အနာကုလကမ္မန္တာ = အနှောင့်အယှက်မရှိသော အမှုတို့ကိုသာပြုခြင်း၊

၁၄။ ဒါနဉ္စ = အလှူပေးခြင်း၊

၁၅။ ဓမ္မစရိယ = မြတ်သောအကျင့်တို့ကို ကျင့်ခြင်း၊

၁၆။ ဉာတကာနဉ္စသင်္ဂဟ = ဆွေးမျိုးတို့အား ထောက်ပံ့ခြင်း၊

၁၇။ အနဝဇ္ဇာနိကမ္မာနိ = အပြစ်မရှိသော အမှုတို့ကိုပြုခြင်း၊

၁၈။ ပါပအာရတီ = မကောင်းမှုမှ ဝေးစွာ ရှောင်ကြဉ်ခြင်း၊

၁၉။ ပါပဝိရတီ = မကောင်းမှုမှ အထူးရှောင်ကြဉ်ခြင်း၊

၂၀။ မဇ္ဇပါနသံသမော = သေရည်သေရက်ကို သောက်စားခြင်းမှ ရှောင်ကြဉ်ခြင်း၊

၂၁။ အပ္ပမာဒေါစ ဓမ္မေသု = ကောင်းမှုကုသိုလ်တို့၌ မမေ့မလျော့ခြင်း၊

၂၂။ ဂါရ၀ = ရိုသေထိုက်သူတို့အား ရိုသေခြင်း၊

၂၃။ နိဝါတ = မိမိကိုယ်ကို နှိမ့်ချခြင်း၊

၂၄။ သန္တုဌီ = ရောင့်ရဲလွယ်ခြင်း၊

၂၅။ ကတညုတ = သူပြုဖူးသော ကျေးဇူးကိုသိခြင်း၊

၂၆။ ကာလေန ဓမ္မဿဝန = သင့်တင့်လျောက်ပတ်သောအခါ၌ သူတော်ကောင်းတရားကို နာယူခြင်း၊

၂၇။ ခန္တီ = သည်းခံခြင်း၊

၂၈။ သောဝစဿတာ = သူတော်ကောင်းတို့ ဆုံးမအပ်သော စကားကို နာလွယ်ခြင်း၊

၂၉။ သမဏာနဉ္စ ဒဿန = ရဟန်းပုဏ္ဏားတို့အား ဖူးမြင်ခြင်း၊

၃၀။ ကာလေနဓမ္မသာကစ္ဆာ = သင့်တင့်လျောက်ပတ်သောအခါ၌ တရားတော်ကို ဆွေးနွေးမေးမြန်းခြင်း၊

၃၁။ တပေါ = ခြိုးခြံစွာကျင့်ခြင်း၊

၃၂။ ဗြဟ္မစရိယ = မြတ်သောအကျင့်တို့ကို ကျင့်ခြင်း၊

၃၃။ အရိယသစ္စာန ဒဿန = အရိယသစ္စာတို့ကို သိမြင်ခြင်း၊

၃၄။ နိဗ္ဗာန သစ္ဆိကိရိယာ = နိဗ္ဗာန်ကို မျက်မှောက်ပြုရခြင်း၊

၃၅။ န ကမ္ပတိ = လောကဓံတရားတို့နှင့်တွေ့သော် တုန်လှုပ်သောစိတ်မရှိခြင်း၊

၃၆။ အသောက = လောကဓံတရားတို့နှင့်တွေ့သော် စိုးရိမ်သောစိတ် မရှိခြင်း၊

၃၇။ ဝိရဇံ = လောကဓံတရားတို့နှင့်တွေ့သော် စိတ်၌ ရမ္မက်မရှိခြင်း၊

၃၈။ ခေမံ = လောကဓံတရားတို့နှင့်တွေ့သော် စိတ်၌ ဘေးမရှိခြင်း။

Credit : သုခမှတ်စု

Credit to All; 

မေတ္တာဖြင်. စုစည်းတင်ပြသူ 

- အနှိုင်းမဲ.စာတိုပေစများ 

- သုခမှတ်စု 

Video Credit to Mg Yin - https://www.youtube.com/watch?v=ePjA2h9ZzIk